Inguruan, Lamikela dago. Historiaurreko hilobiak ditu eta horrek hiribilduaren antzinatasuna adierazten digu.

Gaonatarrek hiribilduan ezarri zuten beren dorretxea, eta leinuaren ondorengo bat Gipuzkoatik zetorren Lazkano familiako batekin ezkontzean, Contrasta Lazkanotarren jaurerrira pasa zen.

Independentzia Gerran eta, batez ere, gerra karlistetan kalte handiak jasan zituen. Elizaren ondoan, itsututako bi arku handi dituen etxea dago. Bertan, Zumalakarregi Jeneralak gerra karlistetako kanpainetan gaua ematen zuela diote.

Gaonatarren dorrea tenpluari atxikita zegoen. Jasokundearen eliza gotorlekua da kanpoaldetik.

Ezin dugu herria utzi Elizmendiko Andre Mariaren baseliza bisitatu gabe. Bere irudiaren edertasunaz gain, ermita honen berezitasuna da hogei harlauza edo hilarri erromatar baino gehiago dituela bere hormetan.