Etxe Berdeak Araba aurkezten dugu

 'Hogares Verdes Araba Etxe Berdeak' hezkuntza-programa eramango dugu Arabako lurralde osora. Programa hori 2015tik dago martxan Gasteizen, eta eguneroko euren erabaki eta ohiturek ingurumenean eta gizartean duten eraginaz arduratzen diren familiei zuzenduta dago. Lehen edizio honetan 120 etxebizitzatara iristea da helburua, kuadrilla guztietan banatuta egongo dira, eta etxebizitza mota desberdinak izango dira, pisuak eta etxe bakarrak, etxebizitzen tamaina eta berokuntza-sistema desberdinak dituztenak. Horiei guztiei beren etxearen kudeaketa arduratsuagoa lortzeko aldaketa-prozesuan lagunduko zaie: uraren eta energiaren etxeko kontsumoaren autokontrola sustatuz, aurrezteko neurriak eta jokabideak sartuz eta erosketa etikoagoa eta ekologikoagoa egiten lagunduz.

Gizarte honetan, gure etxeen eguneroko kudeaketa ere baliabideen kontsumitzaile handia da eta ingurumenean inpaktu handia duten emisioak, isuriak eta hondakinak sortzen dira, hortaz, 'Araba Etxe Berdeak' programa familien borondatezko parte-hartzearen bidez egituratzen da. Parte-hartzaile guztiei zenbait ingurumen-helburu edo -erronka planteatzen zaizkie, beren etxeetan lortu beharrekoak, hala nola ura edo energia aurreztea, hondakinak murriztea, etab.

Lurralde osora iristeko lehen esperientzia pilotu honetan, programa urteko hiru ediziotan egitea planteatzen da: lehenengoan, parte-hartzaileek beren etxeetan ur eta energia kopuru esanguratsua aurrezteko eta hondakinak behar bezala kudeatzeko erronkari aurre egingo diote; esperientzian aurrera egin nahi dutenei beren etxeetan kontsumitzeko modu adeitsuagoa proposatuko zaie; eta, amaitzeko, tailerrak eta jarduera praktikoak egingo dira, aurreko edizio bietan proposatutako gaietan sakontzen eta lan egiten jarraitzeko. Programa sustatuko du lurraldean, eta ingurumenaren arloko kontzientziazio- eta neurketa-ekintzetan espezializatutako profesionalen talde baten aholkularitza eta koordinazioa izango du. 

Prestakuntza-tailerrez eta interes guneetara egingo diren txangoez gain, "Araba Etxe Berdeak" programan parte hartzen duten familiei hainbat material emango zaie: aurrezki- eta efizientzia-kita, informazio-materialak, kontsumo-produktuak, etab. 

Interesa duten familiek eman dezakete izena webgunean edo 945 776 858 telefonoan.