Astorgatik Bordelera doan erromatar galtzadan zegoen herria zenez, erromesak gelditzeko ospitale bat ere bazegoen.

1590ean, Domingo Ruiz de Luzuriagak kapilautza bat sortu zuen bere herriari zenbait onura emateko, baita parrokiako apaiza kristau doktrina euskaraz irakastera behartzen zuen klausula bitxi bat ere.

Jasokundearen elizak, XIII. mendeko lau arkiboltadun portada ederra du, lore irudiekin (eguzki-lore moduko bat ere bai), medailoiekin, aingeru musikari batekin, aurpegiekin, animaliekin, besteak beste.

Baina bere altxorra sakristian dago: XVI. mendeko antzinako erretaula batetik datorren predela bat, Pierres Picarten margolanekin. Erretaula nagusia xumea baina interesgarria da. San Pedro eta San Pauloren tailu bi ikus daitezke sagrarioaren alboetan eta, goiko pisuan, Jasokundearen irudi polit bat mihise biren alboan.